8 наурыз - Халықаралық әйелдер күніне орай

Қасиетті Рамазан айының рухани мәнімен астасып, көктемнің шуақты мерекесі – 8 наурыз Халықаралық әйелдер күніне орай Қазалы ауданында тағылымды әрі жүрекке жылу сыйлаған шара ұйымдастырылды.

Бұл күні Қазалы аудандық Әйелдер кеңесінің төрайымы, аудандық филиал жанындағы Әйелдер қанатының жетекшісі Роза Шорақызы Асанова бастаған бір топ белсенді нәзікжандылар мен «AMANAT» партиясы аудандық филиалы жанындағы Әйелдер қанатының мүшелері Қазалы аудандық зағиптар қоғамының ардақты аналарына арнайы барып, құрмет көрсетті.

Кездесу барысында аналардың өмірлік тәжірибесі мен төзімі, қайсарлығы ерекше аталып өтіп, олардың қоғамдағы орны мен тәрбиелік рөліне жоғары баға берілді. Ізгі ниетпен ұйымдастырылған бұл шара – тек мерекелік құттықтау ғана емес, жан жылуын сыйлап, көңілдеріне қуаныш ұялатқан рухани қолдау болды.

Ана – мейірімнің, махаббаттың, шексіз сабыр мен төзімнің символы. Қандай жағдайда да өмірге деген сенімін жоғалтпай, отбасына тірек болып отырған жандарға құрмет көрсету – баршамыздың парызымыз.

Осындай игі бастамалар алдағы уақытта да жалғасын табары сөзсіз.

Құрметті аналар! Сіздерге зор денсаулық, ұзақ ғұмыр, отбасыларыңызға амандық, бақ-береке тілейміз. Әр шаңырақта шаттық пен жылулық, татулық пен бірлік орнасын!