«ӘЙЕЛ ӨМІРІ ҮШІН»
Сүт безі обыры туралы республикалық ақпараттандыру айлығы аясында Созақ ауданында ақпараттық-түсіндіру жұмыстары жүргізілді. Іс-шараның негізгі мақсаты – әйелдер арасында сүт безі обырының алдын алу, ерте анықтау және тұрақты медициналық тексеруден өтудің маңыздылығын түсіндіру.
Республикалық ақпараттандыру айлығы аясында «Сүт безінің саулығы туралы 5 минут» ақпараттық кездесуі және «Тексерілуге уақыт бөл» республикалық ашық есік күні ұйымдастырылды. Кездесу барысында мамандар әйелдерге сүт безі ауруларының алдын алу, алғашқы белгілеріне мән беру және уақытылы медициналық тексеруден өтудің маңыздылығы туралы кеңестер берді.
Іс-шараға «Әділет» партиясы Созақ аудандық филиалы жанындағы Әйелдер қанатының жетекшісі Отыншиева Рабиға Шамақызы және Созақ аудандық орталық емханасының маммолог дәрігері қатысып, әйелдер денсаулығын сақтау, аурудың алдын алу және скринингтік тексерулердің маңызы жөнінде жан-жақты ақпарат берді.
Сонымен қатар, тұрғындарға бейінді мамандардың кеңестері ұсынылып, қажетті медициналық тексерулерден өту тәртібі түсіндірілді. Кездесуде әйелдердің өз денсаулығына ұқыпты қарауы, профилактикалық тексерулерден уақытылы өтуі және аурудың алдын алу шараларын тұрақты жүргізуі қажеттігі атап өтілді.
Мамандар әйелдерді денсаулық жағдайына бейжай қарамауға, салауатты өмір салтын ұстануға және дәрігерлік тексерулерден жүйелі түрде өтуге шақырды.
Әйел денсаулығы – отбасы мен қоғам саулығының маңызды кепілі. Денсаулыққа уақыт бөлу – өз өміріңе қамқорлық жасау!
