Көпбалалы және жас аналардың қатысуымен «Отбасылық құндылық: тәрбие тал бесіктен!» тақырыбындағы дөңгелек үстел

«Руханият» орталығында Қазалы аудандық Отбасын қолдау орталығы мен партияның аудандық филиалы жанындағы Әйелдер қанатының ұйымдастыруымен көпбалалы және жас аналардың қатысуымен «Отбасылық құндылық: тәрбие тал бесіктен!» тақырыбында дөңгелек үстел өтті. Іс-шараның мақсаты – отбасының қоғамдағы рөлін насихаттау, ұлттық құндылықтардың маңызын түсіндіру және бала тәрбиесіндегі отбасының орны туралы пікір алмасу.Жиынды аудандық әйелдер кеңесінің және Әйелдер қанатының төрайымы Роза Асанова ашып, қатысушыларды 15 мамыр – Халықаралық отбасы күнімен құттықтады. Шара барысында «Медицина саласының үздігі» төсбелгісінің иегері, көпбалалы ана, кәсіпкер Гүлзат Ешмұратова мен қолөнер шебері, көпбалалы ана Нағима Майлыбаева өз өмірлік тәжірибелерімен бөлісіп, отбасының басты құндылығы – рухани бірлік, өзара құрмет пен сыйластық екенін атап өтті. Дөңгелек үстелде қатысушылар отбасы бірлігі, ұлттық тәрбие, ананың бала тәрбиесіндегі рөлі мен қоғамдағы сыйластық мәдениеті жайында тағылымды ойларын ортаға салды.