ҚОСТАНАЙДАҒЫ САЙЛАУАЛДЫ ШТАБ ЖҰМЫСЫ ЖОҒАРЫ БАҒАЛАНДЫ
Қостанайда «Әділет» партиясының облыстық сайлауалды штабының сайлауалды науқан кезеңіндегі жұмысы қорытындыланып, белсенді азаматтарды марапаттау рәсімі өтті.
Жиын барысында сайлауалды науқанның өту барысы сараланып, партияның бағдарламалық басымдықтарын тұрғындарға кеңінен таныстыруға, азаматтармен тікелей байланыс орнатуға және сайлау үдерісінің ашық әрі тиімді өтуіне үлес қосқан азаматтардың еңбегі атап өтілді.
Штаб мүшелеріне партия Төрағасы Айбек Арқабайұлы Дәдебайдың атынан алғыс хаттар табысталды.
Облыстық сайлауалды штабының төрағасы Бибігүл Аққожина өз сөзінде қол жеткізілген нәтижелердің артында үлкен команданың үйлесімді жұмысы тұрғанын атап өтті.
«Сайлау нәтижесін біз ең алдымен азаматтардың партияға білдірген зор сенімі әрі үлкен жауапкершілік деп қабылдаймыз. Бұл көрсеткішке бір адамның емес, ортақ мақсатқа жұмылған үлкен команданың бірлескен еңбегі арқылы жеттік», – деді Бибігүл Аққожина.
Сайлауалды науқан барысында партия кандидаттары, сенімді өкілдер мен үгіт топтарының мүшелері облыстың қалалары мен ауылдарында тұрғындармен көптеген кездесулер өткізді.