Қыздарымыздың қауіпсіздігі — ортақ міндет

М. Әуезов атындағы жалпы білім беретін мектептің 8–11 сынып оқушы қыздарымен әйелдер мен қыз балаларға қатысты зорлық-зомбылықтың алдын алу және олардың құқықтық сауаттылығын арттыру мақсатында маңызды кездесу өткіздім. «Әйелдер қанаты» қоғамдық ұйымының төрайымы әрі әйелдер мен қыз балалардың құқықтарын қорғау бағытында жұмыс жүргізетін заңгер ретінде кездесуде жасөспірім қыздарға зорлық-зомбылықтың алдын алу, өз құқықтары мен жеке шекарасын қорғау, қауіптің алғашқы белгілерін ажырата білу мәселелері бойынша құқықтық түсіндіру жұмыстарын жүргіздім.

Кездесу барысында зорлық-зомбылыққа ұшыраған жағдайда қайда жүгінуге болады, кімнен көмек сұрауға болады, құқықтары бұзылған кезде қандай әрекет жасау қажет екені нақты түсіндірілді. Қыздарға қиын жағдайды жалғыз көтермей, ата-анасына немесе өзіне сенімді ересек адамға айту, мектеп психологы мен әлеуметтік педагогке жүгіну, қажет болған жағдайда құқық қорғау органдары мен тиісті көмек көрсету қызметтеріне хабарласудың маңыздылығы айтылды. Сонымен қатар буллинг, қорқыту, бопсалау, психологиялық қысым және өзге де зорлық түрлеріне немқұрайлы қарамау керектігі түсіндірілді.

Әрбір қыз өз құқығын білуі керек. Өз құқығын білетін қыз — өзін қорғай алады. Ал өзін қорғай алатын қыз — қауіпсіз әрі сенімді болашаққа қадам басады.

Бүгінгі жасөспірім қыз — ертеңгі білімді маман, ана, қоғамның белсенді мүшесі. Сондықтан олардың қауіпсіздігі мен құқықтарын қорғау — тек отбасының ғана емес, бүкіл қоғамның ортақ міндеті.

Қыздарымыз — еліміздің болашағы. Олардың тағдырына бейжай қарамай, қауіпсіздігін қамтамасыз ету, құқықтық сауатын арттыру және зорлық-зомбылықсыз орта қалыптастыру — біздің басты міндеттеріміздің бірі.

«Әйелдер қанаты» қоғамдық ұйымы ретінде әйелдер мен қыз балалардың құқықтарын қорғау, зорлық-зомбылықтың алдын алу және құқықтық мәдениетті қалыптастыру бағытындағы жұмыстарды жүйелі түрде жалғастырамыз.