Отбасы – әр адамның шағын отаны
Көксу ауданында «Үздік жас отбасы» номинациясының жеңімпазы Жанғабыловтар отбасымен тағылымды кездесу өтті. Кездесуде отбасы құндылықтары, ұлттық тәрбие, бала тәрбиесі, еңбекқорлық пен кәсіпкерліктің маңызы сөз болып, жас ұрпаққа өнегелі отбасының тәжірибесі таныстырылды.
«Отбасы – әр адамның шағын отаны» атты тағылымды кездесу өтті
Жетісу облысы әкімінің «Көшбасшы-2025» жастар сыйлығының «Үздік жас отбасы» номинациясының жеңімпазы – Жангабыловтар отбасымен тағылымды кездесу өтті.
Іс-шараның мақсаты – отбасылық құндылықтарды дәріптеу, берекелі шаңырақтың қоғамдағы рөлін насихаттау, жастарға үлгілі отбасының өнегесін көрсету және еңбекқорлық пен кәсіпкерліктің маңызын кеңінен таныту.
Көксу ауданы мәдениет үйінің директоры Алишер Асқарұлы Жанғабылов отбасы құндылықтары, ұлттық тәрбие мен мәдениеттің ұрпақ тәрбиесіндегі маңызы туралы өз ойымен бөлісті. Өңірлік әйелдер қанатының мүшесі, «Үздік келін – 2022» байқауының жеңімпазы, қоғам белсендісі Айнұр Алтынбайқызы өз отбасының қалыптасу жолы, бала тәрбиесі, жанұядағы сыйластық пен татулықтың маңызы, сондай-ақ жетістіктерге жетудегі отбасының қолдауы туралы әсерлі әңгіме өрбітті.
Сонымен қатар, Айнұр Алтынбайқызы Балпық би кентінде орналасқан өзінің гүлдер дүкені арқылы шағын кәсіпті дамыту тәжірибесімен бөлісіп, табысты кәсіптің негізінде адал еңбек, жауапкершілік және отбасының бірлігі жатқанын атап өтті.
«Отбасы – әр адамның шағын отаны» тақырыбындағы кездесу отбасы институтын нығайтуға, ұлттық құндылықтарды ұлықтауға және қоғамдағы бірлік пен ізгілікті дәріптеуге бағытталған маңызды рухани шаралардың бірі болды.