Отырар ауданында сүт безі обыры ауруын алдын алу бойынша «Тексерілуге уақыт бөл» ашық есік күні өтті
Сүт безі обыры туралы республикалық ақпараттандыру айлығы аясында Отырар ауданында әйелдер арасында ақпараттық-түсіндіру жұмыстары жүргізілді. Іс-шараның негізгі мақсаты – әйелдерге сүт безі обырының алдын алу, ауруды ерте анықтау және өз денсаулығына жауапкершілікпен қараудың маңыздылығын түсіндіру.
Ақпараттандыру айлығы аясында «Сүт безінің саулығы туралы 5 минут» ақпараттық кездесуі және «Тексерілуге уақыт бөл» республикалық ашық есік күні ұйымдастырылды. Кездесу барысында мамандар сүт безі ауруларының алдын алу, алғашқы белгілеріне назар аудару және медициналық тексерулерден уақытылы өтудің маңыздылығы жөнінде кеңестер берді.
Іс-шараға «Әділет» партиясы Отырар аудандық филиалы жанындағы Әйелдер қанатының жетекшісі Едигеева Тынышкүл Мұратқызы және Отырар аудандық орталық емханасының маммолог дәрігері қатысып, әйелдер денсаулығын сақтау, аурудың алдын алу және скринингтік тексерулердің маңызы туралы жан-жақты ақпарат берді.
Сонымен қатар, қатысушыларға бейінді мамандар тарапынан кеңестер беріліп, қажетті медициналық тексерулерден өту тәртібі түсіндірілді.
Кездесу барысында әйелдердің өз денсаулығына бейжай қарамай, профилактикалық тексерулерден уақытылы өтуі және аурудың алдын алу шараларына жауапкершілікпен қарауы қажеттігі атап өтілді.
Әйел денсаулығы – отбасы мен қоғам саулығының маңызды кепілі.
Өз денсаулығыңызға уақыт бөлу – өз өміріңізге деген қамқорлық.
Тексеріліңіз. Алдын алыңыз. Өміріңізді бағалаңыз!
