«Әділет» партиясы Отбасы күні қарсаңында отбасыларға қолдау көрсетті
Отбасы күні қарсаңында «Әділет» партиясы Батыс Қазақстан облыстық филиалының төрағасы Бауржан Бектұрған және облыстық партия филиалының әйелдер қанатының жетекшісі, Орал қалалық мәслихатының депутаты Нұргүл Ашикова Отбасын қолдау орталығына барып, орталықтағы балалар мен отбасыларға арнайы сыйлықтар табыстады.
Іс-шара барысында балаларға ойлау қабілеті мен шығармашылығын дамытуға арналған пайдалы ойыншықтар, ал отбасыларға азық-түлік себеттері берілді.
Кездесуде Бауржан Бектұрған Отбасын қолдау орталығының қоғамдағы маңызды рөліне тоқталды.
«Отбасы – қоғамның негізгі тірегі. Отбасын қолдау орталығы қиын жағдайға тап болған азаматтарға қажетті көмек көрсетіп, отбасылардың мәселесін шешуге және балалардың қауіпсіз әрі қолайлы ортада тәрбиеленуіне ықпал етіп келеді. Орталықтың отбасы институтын нығайтудағы және балалардың жан-жақты дамуына жағдай жасаудағы еңбегі ерекше», – деді партия филиалының төрағасы.
Ал партияның әйелдер қанатының жетекшісі Нұргүл Ашикова орталық қызметкерлеріне күнделікті атқарып жүрген жауапты әрі қажырлы еңбегі үшін алғыс білдірді.
Кездесу соңында орталықта тұрып жатқан отбасылар көрсетілген назар мен қолдау үшін ризашылықтарын білдіріп, балаларға арналған сыйлықтар мен азық-түлік себеттері үшін алғыстарын жеткізді. Олар игі бастамалардың жалғасын тауып, мұндай қолдаудың алдағы уақытта да көрсетіле беруіне тілектестік білдірді.
Айта кету керек, ағымдағы жыл бойынша «Отбасын қолдау орталығына» аз қамтылған және көпбалалы отбасылар санатындағы 670 азамат түрлі әлеуметтік, құқықтық және психологиялық мәселелер бойынша жүгініп, оларға жалпы саны 714 қызмет көрсетілді. Оның ішінде 92 әлеуметтік, 118 психологиялық және 338 заңгерлік қызмет көрсетілген. Бұл көрсеткіштер Орталықтың қиын жағдайға тап болған отбасыларға кешенді қолдау көрсетудегі маңызды рөлін айғақтайды. Бұл көмектер алдағы уақытта да өз жалғасын таба бермек.
«Әділет» партиясы үшін отбасы құндылықтарын нығайту, балалардың әл-ауқатын арттыру және әлеуметтік қолдауды қажет ететін азаматтарға назар аудару – маңызды бағыттардың бірі.