Алматы облысы AMANAT партиясы жанындағы «Әйелдер қанатының» ұйымдастыруымен Есік қаласындағы Райымбек батыр атындағы орта мектбінде "Қоғамдағы әйелдердің рөлін арттыру" атты кездесу өтті.
Кездесу барысында қоғамдағы әйелдердің рөлін арттыру, олардың құқықтық сауаттылығын күшейту және заң шығару үдерісіне белсенді қатысуын қамтамасыз ету мәселелері кеңінен талқыланды.
Іс-шараның негізгі тақырыбы – заң жобаларына гендерлік сараптама жүргізудің маңыздылығы болды. Қатысушылар заң қабылдау кезінде әйелдер мен ер азаматтардың мүдделері тең дәрежеде ескерілуі қажеттігін атап өтіп, гендерлік сараптаманың қоғамдағы әлеуметтік теңдікті нығайтудағы рөліне тоқталды. Сонымен қатар, әйелдердің құқықтарын қорғау, отбасы институтын қолдау, еңбек нарығындағы мүмкіндіктерді кеңейту және әлеуметтік саясаттағы өзекті мәселелер бойынша пікір алмасу ұйымдастырылды.
Кездесу барысында қатысушылар өз ұсыныстары мен бастамаларын ортаға салып, заңнамалық өзгерістерге қатысты ой-пікірлерін білдірді. Ашық форматта өткен жиында әйелдердің қоғамдық-саяси белсенділігін арттыру, мемлекеттік шешімдер қабылдау үдерісіне қатысуын кеңейту бағытындағы нақты ұсыныстар айтылды.
Шара соңында мұндай кездесулердің маңыздылығы ерекше атап өтіліп, алдағы уақытта да әйелдер қауымымен тұрақты түрде диалог алаңдарын ұйымдастыру жалғасатыны жеткізілді.