«АУЫЛДАҒЫ ӘЙЕЛДЕР КӘСІПКЕРЛІГІН ДАМЫТУҒА ҚОЛДАУ» ТАҚЫРЫБЫНДА КЕЗДЕСУ ӨТТІ.
Іс-шараға «AMANAT» партиясы аудандық филиалы жанындағы Әйелдер қанатының төрайымы Рабиға Отыншиева, ауданның белсенді кәсіпкерлері мен Әйелдер қанатының мүшелері қатысты. Атап айтқанда, Бибімария Тұрмаханова, Нұржамал Төлеуова, Әмина Қалманбаева, Рысты Райымқұлова, Айжан Манапова, Жансая Ерденова және ауданымыздағы бірқатар кәсіпкер әйелдер бас қосып, өзара тәжірибе алмасты.
Кездесу барысында ауыл әйелдерінің кәсіпкерлік саласындағы белсенділігін арттыру, мемлекеттік бағдарламалар арқылы көрсетілетін қолдау тетіктерін тиімді пайдалану, жаңа жобаларды жүзеге асыру және бизнесті дамыту бағытындағы өзекті мәселелер талқыланды.
Дөңгелек үстелде “Әйелдер қанатының төрайымы” Рабиға Отыншиева сөз сөйлеп, ауыл әйелдерінің кәсіпкерлікке белсенді араласуы ауылдың әлеуметтік-экономикалық дамуына оң әсер ететінін атап өтті. Сонымен қатар, кәсіпкер Әмина Қалманбаева өз кәсібін жүргізудегі тәжірибесімен бөлісіп, кәсіп бастаудағы табандылық пен еңбектің маңызына тоқталды. Ал кәсіпкер Бибімәриям Тұрмаханова ауыл кәсіпкерлігін дамытудағы өзекті мәселелерге тоқталып, әйелдердің өзара тәжірибе алмасуы мен ынтымақтастығының маңызын атап өтті.
Сонымен қатар Әйелдер қанатының мүшесі Нұржамал Төлеуова сөз алып, ауыл әйелдерінің қоғамдық өмір мен кәсіпкерлік саласындағы белсенділігін арттырудың маңыздылығына тоқталды. Өз кезегінде Жансая Ерденова ауылдық жерлерде кәсіп бастауға ниетті әйелдерге қолайлы жағдай жасау және олардың тәжірибе алмасуына мүмкіндік беретін осындай кездесулердің маңызы зор екенін жеткізді. Ал Айжан Манапова кәсіпкер әйелдердің жетістіктерін кеңінен насихаттау, олардың жаңа жобаларын қолдау және өзара ынтымақтастықты дамыту бағытындағы ұсыныстарымен бөлісті.
Қатысушылар өз кәсіптерінің қалыптасу жолы мен жетістіктері туралы айтып, тәжірибелерімен бөлісіп, кәсіпкерлікті дамытуға қатысты ұсыныстарын ортаға салды.
Шара барысында кәсіпкер әйелдердің қоғамдағы рөлін арттыру, олардың бастамаларына қолдау көрсету және табысты тәжірибелерін кеңінен насихаттау мәселелеріне ерекше назар аударылды. Кездесу қорытындысында алдағы уақытта кәсіпкер әйелдердің қатысуымен ауқымды форум ұйымдастыру, үздік жобаларды облыстық деңгейде таныстыру және өзара ынтымақтастықты нығайту жөнінде ұсыныстар айтылды.
Дөңгелек үстел ашық пікір алмасу алаңына айналып, ауыл әйелдерінің кәсіпкерлік әлеуетін арттыруға бағытталған маңызды бастамалардың негізін қалады.