Әйел денсаулығы – қоғам байлығы: Таразда маңызды кездесулер өтті
Тараз қаласында 300-ге жуық әйелге сүт безі обырының алдын алу және ерте анықтау бойынша ақпараттық кездесулер өткізілді.
«Әділет» партиясы Жамбыл облыстық филиалының Әйелдер қанаты Тараз қаласындағы алты бірдей ірі мекемеде ақпараттық-танымдық кездесулер топтамасын ұйымдастырды. Ауқымды шара «Әйел өмірі үшін» атты республикалық айлығы аясында қолға алынды.
Денсаулық пен сауаттылықты арттыруды көздеген басқосулар келесі ұйымдарда өтті:
• Мектеп олимпиадаларын және мектептен тыс іс-шараларды өткізу облыстық орталығы;
• «Білім» кәсіби-гуманитарлық-техникалық колледжі;
• «ТаразЭнергоОрталығы» АҚ;
• «Анаға тағзым» отбасын қолдау орталығы;
• №35 балабақша;
• №53 мектеп-гимназия.
Маңызды жиындарға 300-ге жуық әйел қатысты. Кездесу аясында арнайы шақырылған облыстық онокология және хирургия орталығының онколог дәрігері Юсантаев Арибжан Гайратович сүт безі обырының алғашқы белгілері, қауіпті дерттің алдын алу шаралары және оны ерте кезеңде анықтаудың маңыздылығы туралы егжей-тегжейлі айтып берді. Қатысушылар дәрігерден пайдалы кеңестер алып, өздерін мазалаған сұрақтарға жауап тапты.
