БЕРЕКЕЛІ ОТБАСЫ – ӘДІЛЕТТІ ҚОҒАМНЫҢ БАСТАУЫ
Талас ауданында Отбасы күніне орай өнегелі отбасылармен кездесу өтіп, отбасы құндылықтары мен бала тәрбиесінің маңызы дәріптелді.
Отбасы – қоғамның ең кіші бөлшегі ғана емес, елдің ертеңін қалыптастыратын үлкен тәрбие мектебі. Отбасы күніне орай Талас аудандық «Әділет» партиясы жанындағы Әйелдер қанатының ұйымдастыруымен көпбалалы және ерекше қажеттіліктері бар бала тәрбиелеп отырған өнегелі отбасылармен тағылымды кездесу өтті.
Жүздесудің өзегі – отбасындағы жауапкершілік, ата-ананың бала тәрбиесіндегі рөлі, өзара сыйластық пен мейірімнің мәні болды. Өмірдің әр сынағын бірге еңсеріп, бала тәрбиесіне бар күш-жігерін арнап жүрген отбасылардың әңгімесі қатысушыларға ерекше әсер сыйлады.
Кездесу барысында үлгілі отбасыларға алғыс айтылып, арнайы сый-сияпаттар табысталды. Ақжарма тілектер айтылып, әр шаңыраққа амандық, татулық пен береке тілінді.
«Әділет» партиясы үшін әділетті қоғам – әр отбасының қадірі мен құқығы қорғалған, әр балаға қамқорлық көрсетілген ортадан басталады. Сондықтан отбасы институтын нығайту, ата-ана жауапкершілігін арттыру, балалардың жан-жақты дамуына жағдай жасау – барша қоғамның ортақ міндеті.
