ЕРІК-ЖІГЕР МЕН ТЕҢ МҮМКІНДІКТЕР МЕЙРАМЫ: МЕРКІДЕ «ШЕКТЕУСІЗ ӘЛЕМ» СПОРТТЫҚ ТУРНИРІ ӨТТІ
Жамбыл облысы Меркі ауданында айрықша жігер мен асқақ рухтың символына айналған, мүмкіндігі шектеулі жандар арасындағы «Шектеусіз әлем» ашық спорттық турнирі өтті.
“Әділет” партиясы аудандық филиалы мен Әйелдер қанаты ұйымдастырған салауатты өмір салтын серік еткен спортшылардың басын қосқан бұл шара тек сайыс қана емес, адам еркіндігі мен теңдігінің шынайы мерекесі болды.
Игі іс-шараға арнайы қатысқан Меркі ауданы Әйелдер қанатының үйлестірушісі Клара Ракаева қатысушыларға өзінің жылы лебізін білдіріп, қолдау көрсетті. Өз сөзінде ол спорттың шекара танымайтынын және бүгінгі додаға қатысып жатқан әрбір жанның жеңіске деген құштарлығы көпке үлгі екенін ерекше атап өтті.
Тартысты да қызықты өткен бұл турнирде бақ сынаған әрбір қатысушы өзінің мықты дайындығы мен қайсар мінезін көрсете білді. Спорттық доданың жабылу салтанатында үздік шыққан спортшылар арнайы марапаттармен, дипломдармен және бағалы естелік сыйлықтармен ұлықталды. Бұл күн меркіліктердің жадында достық пен асқақ рух салтанат құрған ерекше күн ретінде сақталары сөзсіз.
