Гендерлік теңдік және инклюзивті білім беру мәселелері талқыланды
«AMANAT» партиясы Әйелдер қанатының мүшесі Айжан Қиясова өңірлік дөңгелек үстелге қатысып, жастар арасында гендерлік теңдік мәдениетін қалыптастыру және инклюзивті білім беру ортасын дамыту мәселелерін талқылады.
2026 жылғы 26 мамырда «AMANAT» партиясы Әйелдер қанатының мүшесі Айжан Қиясова «Инклюзивті университет: жастардың гендерлік теңдік туралы тұрақты көзқарасын қалыптастыру және тәрбиелеу мәселелері» тақырыбындағы өңірлік дөңгелек үстел жұмысына қатысты.
Кездесу барысында жастар ортасында теңдік пен өзара құрмет мәдениетін қалыптастыру, инклюзивті білім беру ортасын дамыту, кемсітушілік пен стереотиптердің алдын алу мәселелері талқыланды. Сонымен қатар университеттердің, отбасының және қоғамдық институттардың жас ұрпақты тәрбиелеудегі рөліне ерекше назар аударылды.
Қатысушылар гендерлік мәдениет, әлеуметтік әділеттілік және өзара құрмет қағидаттарын нығайту қоғамның тұрақты дамуы үшін маңызды факторлардың бірі екенін атап өтті.
Бүгінде мұндай диалог алаңдарының маңызы артып келеді. Себебі жастардың саналы көзқарасын қалыптастыру, тең мүмкіндіктерді қолдау және адам капиталының сапасын арттыру елдің болашақ дамуына тікелей әсер етеді.