Nazarbayev University-де әйелдер көшбасшылығын дамыту бағдарламасы бастау алды
Nazarbayev University-де әйелдердің көшбасшылық әлеуетін дамытуға және қоғамның негізгі салалары үшін тұрақты кадрлық резерв қалыптастыруға бағытталған Women Leadership Development Programme (WLDP) бағдарламасы өз жұмысын бастады. Бастамаға білім және ғылым жүйесінің, мемлекеттік басқару саласының, бизнес қауымдастықтың, үкіметтік емес және өңірлік ұйымдардың өкілдері болып табылатын 80-нен астам қатысушы тартылды.
Бағдарлама Назарбаев Университетінің Жоғары білім беру мектебі, Жоғары мемлекеттік саясат мектебі және Жоғары бизнес мектебі тарапынан Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссияның қолдауымен әзірленген. Оқу аралас форматта ұйымдастырылып, 120 академиялық сағатты, менторлық қолдауды, салааралық нетворкингті және қорытынды жобаларды әзірлеуді қамтиды.
Бағдарламаға жоғары оқу орындарының, орта және мектепке дейінгі білім беру ұйымдарының басшылары, сондай-ақ саясаттану және бизнес салаларының өкілдері қатысуда. Сонымен қатар, Әйелдер қанатының өңірлік жетекшілері мен мүшелері де оқуға белсенді түрде тартылған.
Бағдарлама аясында Әйелдер қанатының төрағасы Шолпан Каринова «Қазақстандағы әйелдер көшбасшылығы: өзгеріс пен тұрақтылықтың күші» тақырыбында дәріс оқып, білім беру және мемлекеттік басқару салаларындағы 20 жылдан астам басқарушылық тәжірибесімен бөлісті.
«Менің жолым – мектеп директорынан Білім министрлігінің бірінші вице-министріне дейінгі қызмет, сондай-ақ еліміздегі ең ірі саяси партияның хатшысы ретіндегі үш жылға жуық тәжірибе. Дәріс барысында жеке тәжірибеммен бөлісіп қана қоймай, қатысушыларға пайдалы болуы мүмкін көшбасшылықтың нақты құралдарын ұсынуға тырыстым», – деді Шолпан Каринова.
Оның айтуынша, әйелдердің кәсіби және тұлғалық дамуға деген қызығушылығы артып келеді. Бұл үрдіс WLDP бағдарламасына қатысушылардың белсенділігінен де, өңірлердегі Әйелдер қанаты мүшелерінің бастамаларынан да айқын байқалады.
Шолпан Каринова сондай-ақ білім беру бастамасын әзірлеу мен жүзеге асыруға қосқан үлесі үшін Nazarbayev University вице-президенті Гүлмира Қанайға және Жоғары білім беру мектебінің үйлестірушісі Жаңыл Жонтаеваға алғысын білдірді.
