Отбасы күні: «Әйелдер қанаты» әлеуметтік көмекті қажет ететін отбасын мерекемен құттықтады
Отбасы күніне орай «Әділет» партиясы Маңғыстау облыстық филиалы жанындағы «Әйелдер қанатының» ұйымдастыруымен әлеуметтік қолдауды қажет ететін отбасыларға көмек көрсетілді.
Іс-шараға партия филиалы төрағасының орынбасары Нұрбек Қарасаев, облыстық «Әйелдер қанатының» жетекшісі Пания Сармурзина және партия белсенділері қатысты.
Белсенділер ерекше бала тәрбиелеп отырған және әлеуметтік қолдауды қажет ететін 6 отбасының шаңырағына арнайы барып, мерекемен құттықтап, сый-құрмет көрсетті. Сонымен қатар демеушілердің қолдауымен отбасыларға ақшалай сыйақы табысталды.
Өз кезегінде облыстық «Әйелдер қанатының» жетекшісі Пания Сармурзина ұйымның негізгі бағыттарына тоқталды. Оның айтуынша, «Әйелдер қанаты» көмекке мұқтаж қыз-келіншектер мен отбасыларды қолдауға бағытталған жүйелі жұмыстар жүргізіп келеді.
«Біздің басты мақсатымыз – әйелдердің мәселесіне бейжай қарамай, олардың құқықтық және әлеуметтік сауаттылығын арттыру, қиын жағдайда қалған жандарға қолдау көрсету. Осы бағытта заңдық, моральдық және психологиялық көмек көрсетуге арналған кездесулер, кеңестер мен түрлі әлеуметтік жобалар ұйымдастырылады. Бүгінгі іс-шара да – отбасы құндылықтарын дәріптеп, көмекке мұқтаж жандарға қолдау көрсетудің бір көрінісі», – деді Пания Сармурзина.
Іс-шара барысында отбасы мүшелерімен әңгімелесіп, олардың ұсыныс-тілектері мен әлеуметтік мәселелері тыңдалды.