ОТБАСЫҒА ҚОЛДАУ – ЖҮРЕКТЕН ЖҮРЕККЕ
Жамбыл ауданында Отбасы күніне орай көпбалалы және әлеуметтік қолдауды қажет ететін отбасыларға азық-түлік себеттері табысталды.
Бүгін Отбасы күніне орай «Әділет» партиясы Жамбыл аудандық филиалы жанындағы Әйелдер қанатының мүшелері көпбалалы және әлеуметтік қолдауды қажет ететін отбасылардың шаңырағына арнайы барып, мерекелік акция өткізді.
Акция барысында отбасыларға азық-түлік себеттері табысталып, балаларға жылы лебіздер мен жақсы көңіл-күй сыйланды.
Бұл – тек материалдық көмек емес, әр отбасыға деген жанашырлық пен қолдаудың белгісі. Қиындыққа тап болған жанұяға көңіл бөліп, жағдайын сұраудың өзі үлкен демеу.
Отбасы – мейірім мен жылудың мекені. Ал оны қолдау – баршамызға ортақ жауапкершілік.
«Әділет» партиясының Әйелдер қанаты осындай игі бастамалар арқылы отбасы құндылықтарын дәріптеп, әлеуметтік қолдауды қажет ететін жандарға жанашырлық таныта береді.
Әр шаңырақта береке, әр балада қуаныш, әр отбасында бақыт болсын! ❤️
