«Шексіз мүмкіндік»: инклюзивті қоғам құру жолындағы маңызды қадам

Қарағанды облыстық «AMANAT» партиясы филиалында «Кедергісіз келешек» – «Шексіз мүмкіндік» жобасы аясында Отбасы және халықты әлеуметтік қорғау жөніндегі кеңес пен партияның облыстық әйелдер қанатының бірлескен дөңгелек үстелі өтті.

Кездесу барысында ерекше білім беру қажеттілігі бар жастарды кәсіби оқыту, кәсіби бағдарлау, жұмысқа орналастыру және әлеуметтік сүйемелдеу мәселелері кеңінен талқыланды.

Дөңгелек үстел жұмысына білім беру, денсаулық сақтау, жұмыспен қамту және әлеуметтік қорғау басқармаларының өкілдері, кәсіпкерлер, колледж директорлары, жұмыс берушілер, ата-аналар мен түлектер қатысты.

Іс-шарада ведомствоаралық өзара іс-қимылды күшейту, инклюзивті жұмыс орындарын құру, өндірістік тәжірибені ұйымдастыру және жас мамандарды қолдау мәселелеріне ерекше назар аударылды.

Кездесу қорытындысы бойынша колледждер мен жұмыс берушілер арасында ынтымақтастық туралы меморандумға қол қойылып, ерекше білім беру қажеттілігі бар жастарды әрі қарай жұмысқа орналастыруға және кәсіби сүйемелдеуге бағытталған нақты қадамдар айқындалды.

Дөңгелек үстелдің практикалық нәтижесі ретінде бірқатар студенттердің іс-шара барысында-ақ жұмысқа орналасуы тіркелді. Бұл партия, білім беру ұйымдары және жұмыс берушілер арасындағы бірлескен жұмыстың тиімділігін көрсетті.

Сондай-ақ жобаны іске асыруға тұрақты үлес қосып жүрген колледж директорлары, әлеуметтік педагогтар, өндірістік оқыту шеберлері және жұмыс берушілер Алғыс хаттармен марапатталды.

Жобаны табысты жүзеге асырудың жарқын мысалы ретінде «CONCERN EVOLUTION STRATEGY» ЖШС-інде студент Ислам Дүсіповтің жұмысқа орналасуы атап өтілді. Компания директоры Индира Нұржанованың қолдауымен жүзеге асқан бұл кейс инклюзивті қоғам қалыптастырудағы өзара әріптестіктің тиімділігін дәлелдеді.

Жиын қорытындысы бойынша «Шексіз мүмкіндік» жобасын одан әрі дамытуға бағытталған нақты ұсыныстар мен тапсырмалар қабылданды.