Ғылымдағы әйелдер – ел болашағының интеллектуалдық тірегі

«Әділет» партиясы Түркістан облыстық филиалы Әйелдер қанатының бастамасымен Кентау көпсалалы колледжінде Жоғары білім қызметкерлерінің кәсіби мерекесіне арналған әйел ғалымдардың жастармен кездесу болды. Іс-шараға облыстық Әйелдер қанатының белсенді мүшелері қатысып, «Ғылымдағы әйелдер» бағыты бойынша ғылым саласында еңбек етіп жүрген әйелдердің тәжірибесі мен жетістіктері жас толқынға таныстырылды.

Елімізде 1 қазан – Жоғары білім қызметкерлерінің күні ретінде кеңінен атап өтіледі. Оның басты мәні – елдің интеллектуалдық әлеуетін қалыптастырып, жас ұрпаққа сапалы білім беріп, ғылымның дамуына үлес қосып жүрген азаматтардың еңбегін дәріптеу. Мемлекет басшысының тапсырмасы бойынша соңғы бес жылда ғылымға бөлінетін қаржы көлемі алты еседен астам өсті. Ғылыми ізденіспен айналысатын жастарға гранттар қарастырылып, халықаралық тағылымдамалардан өтуге мүмкіндік жасалды. Соңғы үш жылда 600-ден астам жас ғалым баспанамен қамтамасыз етілді.

Ғылымға келген әрбір жаңа буын – мемлекеттің зияткерлік әлеуетін қалыптастыратын күш.

«Әділет» партиясының Әйелдер қанаты үшін «Ғылымдағы әйелдер» бағыты бір реттік іс-шарамен шектелмейді. Алдағы уақытта да ғылым жолын таңдаған әйелдер мен жастардың басын қосып, олардың пікірін тыңдау, тәжірибе алмасу және ғылыми ізденіске қызығушылығын арттыру бағытындағы кездесулер тұрақты түрде жалғасын табады. Партиямыз осы бағыттағы жұмыстарды жүйелі түрде жалғастырып, ғылымдағы әйелдердің еңбегін дәріптеуге және жастардың ғылыми ортаға еркін араласуына мүмкіндік беретін жаңа алаңдарды қалыптастыруды көздейді.