ҚОСТАНАЙДА ОТБАСЫЛЫҚ ШАХМАТ ТУРНИРІ ӨТТІ
Іс-шара Қазақстан шахмат федерациясының Қостанай облысы бойынша филиалымен бірлесіп, «Адал азамат» тәрбие бағдарламасын іске асыру аясында ұйымдастырылды. Турнирге «Әділет» партиясы Әйелдер қанатының мүшелері де қатысты.
Турнирдің бастамашысы әрі ұйымдастырушысы – «Әділет» партиясы Әйелдер қанатының белсенді мүшесі, А. М. Горький атындағы гимназияның директоры Гүлфия Дандыбаева.
Жарыстың басты ерекшелігі – оған гимназия оқушылары мен олардың ата-аналарынан құралған 64 адамның бір уақытта қатысуы болды. Шахмат тақтасындағы тартыс әр буын өкілдерін біріктіріп, отбасы мүшелеріне бірге уақыт өткізуге, өзара қарым-қатынасты нығайтуға және интеллектуалдық қабілеттерін дамытуға мүмкіндік берді.
«Шахмат балаларды логикалық ойлауға, салмақты шешім қабылдауға, өз таңдауы үшін жауапкершілік алуға және қарсыласын құрметтеуге үйретеді. Бұл үдеріске ата-аналар баласымен бірге қатысқан кезде, балалардың зияткерлік спортқа деген қызығушылығы артып қана қоймай, отбасы мен мектеп арасындағы байланыс та нығая түседі», – деді Гүлфия Дандыбаева.
Іс-шараға «Әділет» партиясы Әйелдер қанатының мүшелері Гүлвира Құдайкулова, Мира Мұратқызы және Несібелі Басенова да қатысты.
Турнир оқушылар арасында шахматты кеңінен насихаттауға, олардың логикалық ойлау қабілетін, мақсатқа ұмтылысын және жауапкершілігін дамытуға, сондай-ақ мектеп пен отбасы арасындағы өзара байланысты нығайтуға ықпал етті.
«Әділет» партиясы мұндай бастамалардың маңыздылығын атап өтті. Отбасылық құндылықтарды дәріптеуге, балалардың бос уақытын тиімді ұйымдастыруға және олардың жан-жақты дамуына жағдай жасауға бағытталған.