Nazarbayev University-де әйелдер көшбасшылығын дамыту бағдарламасы басталды.
Nazarbayev University-де әйелдер көшбасшылығын дамыту бағдарламасы іске қосылды
Nazarbayev University-де әйелдердің көшбасшылық құзыреттерін дамытуға және Қазақстанның қоғамдық өмірінің түрлі салалары үшін кадрлық резерв қалыптастыруға бағытталған Women Leadership Development Programme (WLDP) білім беру бағдарламасы басталды.
Бағдарлама Nazarbayev University-дің Жоғары білім беру мектебі, Жоғары мемлекеттік саясат мектебі және Жоғары бизнес мектебі тарапынан Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссияның қолдауымен жүзеге асырылуда. Оқытуға білім беру, ғылым, мемлекеттік басқару, бизнес, үкіметтік емес сектор және өңірлік ұйымдардың 80-нен астам өкілі қатысуда.
Білім беру курсы 120 академиялық сағатты, менторлық қолдауды, салааралық тәжірибе алмасуды және тәжірибелік жобаларды әзірлеуді қамтиды. Бағдарлама тыңдаушылары қатарында жоғары оқу орындарының басшылары, орта және мектепке дейінгі білім беру ұйымдарының жетекшілері, сарапшылар қауымдастығының өкілдері, бизнес саласының мамандары, сондай-ақ еліміздің өңірлеріндегі Әйелдер қанатының белсенділері мен жетекшілері бар.
Оқу аясында Әйелдер қанатының төрайымы Шолпан Каринова «Қазақстандағы әйелдер көшбасшылығы: өзгерістер мен тұрақтылықтың күші» тақырыбында авторлық дәріс өткізді. Ол өз сөзінде білім беру және мемлекеттік басқару салаларындағы кәсіби тәжірибесімен бөлісіп, көшбасшылық қасиеттерді дамытудың заманауи тәсілдері туралы айтты.
Шолпан Каринованың айтуынша, бүгінде әйелдер кәсіби дамуға, басқарушылық құзыреттерін кеңейтуге және елдің қоғамдық-саяси өміріне белсенді қатысуға көбірек ұмтылуда. Осындай білім беру бастамалары әйел көшбасшылардың әлеуетін ашуға және олардың барлық деңгейдегі шешім қабылдау үдерістеріндегі рөлін күшейтуге қосымша мүмкіндік береді.
Сонымен қатар, Әйелдер қанатының төрайымы бағдарламаның жоғары деңгейде ұйымдастырылғанын атап өтіп, әйелдер көшбасшылығын дамытуға және ел көлемінде тиімді кәсіби қауымдастық қалыптастыруға ықпал ететін жобаны жүзеге асырғаны үшін Nazarbayev University ұжымына алғысын білдірді.