САУРАН АУДАНЫНДА ӨНЕР МЕН МЕЙІРІМ ТОҒЫСҚАН БАЙҚАУ ӨТТІ
"AMANAT" партиясы Сауран аудандық филиалы жанындағы Әйелдер қанатының ұйымдастыруымен «Гүл Fest аруы – 2026» байқауы жоғары деңгейде ұйымдастырылды. Шараға аудандық Әйелдер қанатының төрайымы Тамара Ерімбет және әйелдер қанатының белсенді мүшелері Алиева Мереке, Гүлбағила Қаражанова, Әлия Алдияров, Махсуда Мамадалиева қатысып, байқаудың маңыздылығына ерекше тоқталды.
Аталған іс-шараның басты мақсаты – инклюзияны қолдау, ерекше білім беру қажеттіліктері бар балаларды қоғамға бейімдеу, олардың шығармашылық қабілеттерін дамыту, өнерге деген қызығушылығын арттыру және өз-өздеріне деген сенімділігін қалыптастыру болып табылады. Сонымен қатар, мұндай шаралар арқылы қоғамда мейірімділік, қамқорлық және тең мүмкіндік қағидаттарын насихаттау көзделді.
Шара барысында қатысушылардың сахна мәдениеті, киім үлгісі, өзін-өзі ұстауы және шығармашылық деңгейі әділқазылар алқасы тарапынан бағаланды. Байқау соңында үздік деп танылған қатысушылар арнайы номинациялармен марапатталып, алғыс хаттар мен сыйлықтар табысталды.
Бұл байқау тек жарыс қана емес, ерекше балалардың қоғамдағы орнын айқындап, олардың мүмкіндіктері шексіз екенін дәлелдеген тағылымды әрі тәрбиелік мәні зор іс-шара болды. Кеш соңында барлық қатысушыларға көтеріңкі көңіл-күй сыйланып, көрермендер тарапынан зор қошемет көрсетілді.
