"Алтын той — 50 жылдық отбасылық бақыт"

Отбасы күні қарсаңында «Әділет» партиясы Зеренді аудандық филиалы Әйелдер қанатының төрайымы Райхан Ғабдуллина Зеренді ауылдық округінің әкімі Нұртас Әбугалиевпен бірге Владимир Александрович пен Тамара Петровна Русактардың шаңырағына арнайы барып, отбасылық өмірлерінің айтулы белесі — отау құрғандарына 50 жыл толуымен құттықтады.

Осыдан тура 50 жыл бұрын, 11 қыркүйекте, Владимир Александрович пен Тамара Петровна өмір жолдарын тоғыстырып, шаңырақ көтерген еді. Жарты ғасыр — бір адам ғұмырына татитын үлкен белес. Осы жылдар ішінде ерлі-зайыптылар махаббат пен өзара құрметті, қамқорлық пен қолдауды серік етіп, талай белесті бірге еңсерді.

Алтын той — бұл жай ғана мерейтой емес, бұл — берік отбасының, адалдықтың, өзара түсіністік пен отбасылық құндылықтардың жарқын үлгісі.

Владимир Александрович пен Тамара Петровнаны алтын тойларымен шын жүректен құттықтаймыз! Оларға зор денсаулық, отбасылық жылулық пен амандық, балалары мен немерелерінің ортасында ұзақ та бақытты ғұмыр тілейміз!

Барша жерлестерімізді Отбасы күнімен құттықтаймыз!