«Бүгінгі аттестат – өткен жолдың жемісі, ертеңгі жеңістердің бастауы.»
Түлектердің аттестат алуы
«AMANAT» партиясы Байзақ аудандық филиалы жанындағы Әйелдер қанатының мүшесі ретінде бүгін Сарыбарақ ауылындағы Сарыбарақ орта мектебінде өткен аттестат тапсыру салтанатына қатысып, түлектердің жүрек толқытар қуанышына куә болдым.
Бұл күн – жай ғана аттестат алатын сәт емес. Бұл – балалық шақпен қоштасып, үлкен өмірдің жаңа белесіне қадам басатын тағылымды, ерекше күн. Кеше ғана мектеп табалдырығын аттаған бүлдіршіндер бүгінде арманы асқақ, мақсаты айқын жас азаматтарға айналып отыр.
Сонымен қатар, округіміздегі Тегістік ауылындағы Ә. Жанқұлиев орта мектебі мен Шахан ауылындағы М. Әуезов атындағы орта мектептерде де түлектерге аттестат табысталып, қуанышты сәттер орын алды.
Ұлы Абай атамыз: «Ғылым таппай мақтанба» десе, Ахмет Байтұрсынұлы: «Білімді болуға оқу керек» деп, білім мен еңбектің өмірдегі орнын айқындап берген. Расында да, бүгінгі жетістік – ертеңгі үлкен жеңістердің бастауы.
Қадірлі түлектер! Алдарыңызда тағы бір маңызды сын – Ұлттық бірыңғай тестілеу. Бұл – білім мен еңбектің таразыға түсетін сәті. Өз күштеріңізге сеніп, табандылық танытсаңыздар, арман еткен оқу орындарыңыздың есігі айқара ашылады деп сенемін.
Ел болашағы – білімді жастардың қолында. Сондықтан қайда жүрсеңіздер де туған жердің абыройын асқақтатып, адал еңбек пен білімді серік етіңіздер.
Бала тәрбиесі мен білім беру жолында аянбай еңбек еткен ұстаздар қауымына және әрдайым қолдау көрсеткен ата-аналарға шынайы ризашылығымды білдіремін.
Ақ жол, жас түлектер! Болашақтарыңыз жарқын, жолдарыңыз ашық болсын!
