«Әділет» партиясы еңбек ардагеріне құрмет көрсетті
Отбасы күні қарсаңында «Әділет» партиясы Батыс Қазақстан облыстық филиалының төрағасы Бауржан Бектұрған, партияның облыстық филиалы жанындағы әйелдер қанатының жетекшісі, Орал қалалық мәслихатының депутаты Нұргүл Ашикова Ақжайық ауданының Құрметті азаматы, еңбек ардагері Мензипа Жұматова Дүйсенбайқызының шаңырағына арнайы барып, туған күнімен құттықтады.
Кездесуге Қазақстан Жазушылар одағының мүшесі, ақын, Ақжайық ауданының Құрметті азаматы Сағынтай Бисенғалиев те қатысты. Ақын Сағынтай Бисенғалиев Ақжайық өңірінің қоғамдық-мәдени өміріне белсенді араласып жүрген шығармашылық тұлға ретінде танымал. Ол республикалық айтыстарға қатысып, жүлдеге ие болған, бүгінде жазба поэзиямен қатар жас ақындарға бағыт-бағдар беріп, айтыс өнеріне баулып келеді.
Кездесу барысында партия өкілдері Мензипа Жұматоваға өңірдің әлеуметтік-мәдени және қоғамдық-саяси дамуына сіңірген еңбегі үшін зор алғыстарын білдірді.
Бауржан Бектұрған Мензипа Жұматованың ел игілігі жолындағы ұзақ жылғы еңбегін жоғары бағалап, оның кейінгі ұрпаққа үлгі боларлық азаматтық ұстанымын атап өтті.
«Мензипа Дүйсенбайқызы – елдің әлеуметтік-мәдени дамуына ұзақ жылдар бойы қызмет етіп, халықтың ықыласы мен құрметіне бөленген азамат. Осындай елге еңбегі сіңген ардақты жандардың өнегелі жолын кейінгі буынға насихаттау – біздің парызымыз. Сізге халық игілігі жолындағы еңбегіңіз үшін шынайы алғысымызды білдіреміз. Деніңізге саулық, отбасыңызға амандық тілейміз», – деді партия филиалының төрағасы.
Өз кезегінде Нұргүл Ашикова да Мензипа Жұматованы туған күнімен құттықтап, әсіресе әйелдер қауымының қоғамдық өмірдегі белсенділігін арттыруға қосқан үлесіне тоқталды.
Кездесу барысында Мензипа Жұматова өзіне көрсетілген құрметке ризашылығын білдіріп, партия өкілдеріне алғысын жеткізді.
«Әділет» партиясы үшін елге еңбегі сіңген азаматтарды құрметтеу, аға буынның өнегесін кейінгі ұрпаққа жеткізу және отбасы мен қоғам құндылықтарын нығайту маңызды бағыттардың бірі болып қала береді.