AMANAT: Ауыл әйелдерінің еңбегі — ел берекесі
Шу ауданының Көктөбе ауылындағы кәсіпкер әйел Жанат Құшманова 13 ауыл әйелін тұрақты жұмыспен қамтып, жергілікті кәсіпкерліктің дамуына үлес қосуда.
Партияның Әйелдер қанатының жетекшісі Айман Әшімова мен әйелдер қанатының белсенді мүшелері Шу ауданына сапар барысында Көктөбе ауылындағы «Дастан» тұшпара цехының тынысымен танысты.
Мұнда жергілікті кәсіпкерліктің тамырына қан жүгіртіп отырған кәсіпкер, іскер әйел Жанат Тұрысбековна Кұшманова 13 ауыл әйелді тұрақты жұмыспен қамтып отыр. Олардың қолынан шыққан дәмді өнімдер сапасымен ерекшеленеді. Өнімнің таралу аймағы: Шу ауданындағы 30 дүкенде сатылымда, көршілес Мойынқұм және Қордай аудандарына да жеткізілуде. Ауылда осындай шағын цехтардың көбеюі — жергілікті экономиканы нығайтып, нәзік жандылардың табыс табуына үлкен мүмкіндік. Сапалы әрі отандық өнімді қолдайтын Жанат Тұрысбековна сынды кәсіпкерлердің ісіне сәттілік тілейміз!
