ҚОРДАЙ АУДАНЫНДА «БАҚЫТТЫ БАЛА – МЫҚТЫ ОТБАСЫ – ЖАРҚЫН БОЛАШАҚ» АТТЫ КЕЗДЕСУ ӨТТІ
Қордай ауданында Отбасы күніне орай ата-аналармен кездесу өтіп, бала тәрбиесі, қауіпсіздігі және отбасылық құндылықтар талқыланды.
Отбасы күніне орай Қордай ауданында ата-аналармен «Бақытты бала – мықты отбасы – жарқын болашақ» тақырыбында кездесу өтті. Іс-шараға «Әділет» партиясы Жамбыл облыстық филиалы жанындағы Әйелдер қанатының жетекшісі Айман Әшімова қатысып, жиналған қауымды мерекемен құттықтады.
Өз сөзінде Айман Әшімова отбасының бала тәрбиесіндегі және қоғам өміріндегі ерекше рөліне тоқталды.
«Қазақта “Отан – отбасынан басталады” деген тағылымды сөз бар. Бұл – халқымыздың ғасырлар бойы қалыптасқан өмірлік ұстанымы. Отбасында мейірім көрген бала – мейірімді, еңбекті көрген бала – еңбекқор, жауапкершілікті сезінген бала – елге адал азамат болып өседі.
“Әділет” партиясының құндылықтары да дәл осы отбасылық тәрбиемен үндеседі. Әділет, патриотизм, еңбекқорлық, жауапкершілік пен прогресс – қоғамға сырттан келетін ұғымдар емес. Олардың бастауы – адамның тәрбиесінде, мінезінде, күнделікті өмірінде», – деді ол.
Кездесу барысында бала қауіпсіздігі, ата-ана мен бала арасындағы сенімді қарым-қатынас, психологиялық қолдау және отбасы мен мектептің өзара серіктестігі талқыланды. Қатысушылар интерактивті тапсырмаларға қатысып, балаға көңіл бөлу мен оны түсінудің маңызын тәжірибе арқылы сезінді.
Бақытты балалық шақ – мейірім мен түсіністікке толы отбасынан басталады. Әр бала қауіпсіз ортада өсіп, әр шаңырақ береке мен бірлікке кенелсін!
