МЕЙІРІМНЕН ТУҒАН МЕРЕКЕ
Отбасы күні құтты болсын!
Отбасы – адам баласына жылу сыйлайтын ең қасиетті мекен. Ал ана жүрегі – сол мейірімнің сарқылмас бұлағының қайнар көзі. Осы айтулы күнге орай ерекше назар мен қолдауға мұқтаж бір отбасына қуаныш сыйлап, мерекелік сый-сияпат жасау ниетімен игілікті шара ұйымдастырдық.
Біздің ұсынысымызды Маңғыстау «Қазақ аналары – дәстүрге жол» қоғамдық бірлестігінің аналары бір ауыздан қолдап, аз ғана уақыттың ішінде қаржы жинап, өз үлестерін қосты. Бұл – жай ғана жиналған қаржы емес. Бұл – аналардың ақ ниеті, жүрек жылуы, бір отбасының жағдайын жүрекпен сезініп , қуанышын өз қуанышындай көрген мейірімі. Сәлемдеме , сыйлықты қабыл алған мүмкіндігі шектеулі отбасындағы жас ана аналардың ықыласына шексіз ризашылығын білдіріп, толқып, қуанышын мөлтілдеген көз жасымен жеткізді. Оның рақметі – барша анаға айтылған ақ батадан кем емес еді.
Кейде бір ауыз жылы сөз, бір азғантай мейірім, бір сәттік қолдау адамның көңіліне үлкен үміт сыйлайды.
Жақсылықтың көкесі – біреудің жүрегіне қуаныш ұялату.
Асыл аналарымыздың осы игі ісі – ел ішіндегі ынтымақ пен жанашырлықтың, қазақ әйеліне тән жұқа жүрек пен мейірімнің жарқын көрінісі.
Алла Тағала әрбіріңіздің ақ ниеттеріңізді қабыл етіп, жасаған жақсылықтарыңызға еселеп сауап жазсын! Шаңырақтарыңызға бақ-береке, дендеріңізге саулық, ұрпақтарыңызға амандық берсін!
Әр шаңырақтан күлкі кетпесін,
әр ана жүрегі қуанышқа толсын,
әр бала ата-анасының мейіріміне бөленсін!
Мейірім тұнған жүректеріңізден айналайын, Маңғыстаулық асыл аналар, алтын арулар!
Жақсылықтарыңыз жалғаса берсін!
Жасай беріңіздер, аяулы аналар!
Алғысқа бөлене беріңіздер!
Шаңырағымыз биік, шекарамыз берік, еліміз бейбіт болсын!