«Тең мүмкіндіктер»: БҚО-да балалардың инклюзивті спорт фестивалі өтті
Батыс Қазақстан облысында «Тең мүмкіндіктер» балалар инклюзивті спорт фестивалінің облыстық кезеңі өтті. Спорттық шараға Орал қаласы мен облыстың барлық аудандарынан 138 бала қатысты.
Фестиваль «Әділет» партиясы Батыс Қазақстан облыстық филиалы мен облыстық білім басқармасының ұйымдастыруымен облыстық балалар мен жасөспірімдер туризм және экология орталығында өтті. Жарысқа 9 команда қатысып, оның құрамында ерекше қажеттіліктері бар 56 бала бақ сынады.
Қатысушылар бочча, жеңіл атлетика және көңілді старт эстафетасы бойынша жарысты. Балалар спорттық шеберліктерін көрсетіп қана қоймай, командалық бірлік, достық және өзара қолдау құндылықтарын да көрсетті.
Фестивальдің ашылу салтанатында «Әділет» партиясы Батыс Қазақстан облыстық филиалының басшысы Бауржан Бектұрған инклюзивті спорттың балалар үшін маңызына тоқталды.
Іс-шара барысында «Әділет» партиясы облыстық филиалы жанындағы Әйелдер қанатының жетекшісі Нұргүл Ашикова да жас қатысушыларға жылы лебізін білдіріп, сәттілік тіледі.
Фестивальдің негізгі мақсаты – спорт арқылы балаларды біріктіру, әр адамның қабілеті мен мүмкіндігіне құрметпен қарау және қоғамда өзара қолдау мен түсіністік мәдениетін қалыптастыру.
Ұйымдастырушылардың айтуынша, мұндай іс-шаралар балалардың спортқа деген қызығушылығын арттырып қана қоймай, олардың өзіне деген сенімін нығайтуға, достық қарым-қатынас орнатуға және командалық рухты қалыптастыруға ықпал етеді.
Фестиваль қорытындысы бойынша үздік командалар мен қатысушылар марапатталды. Облыстық кезеңнің жеңімпаздары «Тең мүмкіндіктер» фестивалінің республикалық кезеңіне жолдама алды.