Төрдегі қария – төгілген қазына
Қарттар күніне орай «Әділет» партиясының бастамасымен қолға алынған «Үш ұрпақ – ортақ мұрат» республикалық фестивалі аясында ауыл ақсақалдары мен әжелеріне құрмет көрсетілді.
Т. Рысқұлов аудандық филиалы Әйелдер қанатының жетекшісі, Құлан БПҰ төрайымы Ш.Дайрабаеваның ұйытқы болуымен аудан қарияларына арналған «Қариясы бар ел – қазыналы ел» атты тағылымды кездесу ұйымдастырылды.
Кездесу өте жылы әрі әсерлі атмосферада өтті. Әйелдер қанатының жетекшісі Ш.Дайрабаева өз сөзінде үлкенді сыйлау, ұлттық құндылықтарды дәріптеу және ұрпақтар сабақтастығын сақтау қоғамның басты міндеті екенін атап өтті. Салиқалы жүздесуде қазыналы қарттарымыздың ақыл-кеңестері тыңдалып, олардың өнегелі әңгімелері жастардың жүрегіне жол тартты.
Шараның сәнін келтірген бүлдіршіндер қарияларға арнап ән шырқап, би билеп, кеш қонақтарына көтеріңкі көңіл-күй сыйлады. Балалар ақ жаулықты әжелер мен ақ сақалды аталарға гүл шоқтарын табыстап, өздерінің ізгі тілектерін білдірген сәтте үлкендердің жүзінде ерекше тебіреніс пен қуаныш ұшқыны байқалды.
Осындай ізгі шаралардың өтуіне мұрындық болып, ел бірлігі мен салт-дәстүрді жаңғыртуға үлес қосып жүрген Әйелдер қанатының бастамасы алдағы уақытта да жалғасын таба бермек.
