Әйел денсаулығы – отбасы амандығының негізі

Әйел денсаулығы – отбасы амандығының негізі
⠀
Ұлытау облысы Сәтбаев қаласында сүт безі обырының алдын алуға арналған республикалық айлық аясында орталық емханада ашық есік күні өтті. Іс-шараны «Әділет» партиясы Ұлытау облыстық филиалы мен партия филиалы жанындағы Әйелдер қанаты өткізді.

Ашық есік күні барысында әйелдер денсаулығына қатысты бірқатар маманның қабылдауы ұйымдастырылды. Атап айтқанда, гинеколог, маммолог, хирург және басқа да бейінді дәрігерлер әйелдерге медициналық кеңес беріп, қажетті тексерулер жүргізді.

Мамандар әйелдерге денсаулыққа жауапкершілікпен қараудың, аурудың алдын алудың және скринингтік тексерулерден белгіленген мерзімде өтіп тұрудың маңыздылығын түсіндірді. Әсіресе сүт безі обырын ерте анықтау ауруды дер кезінде емдеуге мүмкіндік беретін маңызды факторлардың бірі екені айтылды.
⠀
«Әйелдің денсаулығы – тек оның жеке мәселесі емес. Ананың дені сау болуы – отбасының берекесі мен балаларының болашағына тікелей әсер етеді. Сондықтан әрбір әйел өз денсаулығына уақыт бөліп, профилактикалық тексерулерден тұрақты өтіп тұруы қажет. Ауруды ерте анықтау – оның алдын алудың ең тиімді жолдарының бірі», - деді «Әділет» партиясы Ұлытау облыстық филиалы жанындағы Әйелдер қанатының «Әйелдер денсаулығын нығайтуға және отбасы институтын қолдауға жәрдемдесу» бағыты бойынша үйлестірушісі Ләззат Ранова.

Ашық есік күніне 200-ге жуық әйел келді. Іс-шара барысында қатысушылар дәрігерлерден кеңес алып, әйелдер денсаулығына қатысты өздерін толғандырған сұрақтарына жауап алды.

Мұндай бастамалар әйелдердің медициналық сауаттылығын арттырып, аурулардың алдын алуға және денсаулыққа жауапкершілікпен қарауға ықпал етеді.https://www.facebook.com/share/19zq13ZHP4/?mibextid=wwXIfrhttps://www.instagram.com/reel/DeL8sw6tuUl/?stkn=cW1uYjJzeW9pdDl3